Premias
La premia da la cassa da malsauns è ina contribuziun d’assicuranza che Vus stuais pajar mintga mais a la cassa da malsauns.
L’autezza da la premia dependa tar tge cassa da malsauns che Vus essas assicurada u assicurà. Ina rolla gioga plinavant, tge model d’assicuranza e tge franschisa che Vus tschernis e nua che Vus abitais. Persunas creschidas fin 25 onns ed uffants pajan premias da la cassa da malsauns pli bassas.
Franschisa
La franschisa è l'import che Vus stuais pajar sezza u sez mintga onn per Voss custs da sanadad. Pir cur che la franschisa è duvrada si, surpiglia la cassa da malsauns ils custs.
In exempel: Vus avais tschernì ina franschisa da 300 francs e stuais ir duas giadas tar la media u tar il medi. La media u il medi metta a quint mintgamai 200 francs per omaduas visitas. Lura pajais Vus sezza u sez l’emprim quint e 100 francs dal segund quint. La cassa da malsauns surpiglia 100 francs dal segund quint (minus la resalva persunala da 10 francs che Vus stuais er pajar, guardar il proxim chapitel) – e tut ils auters quints che resultan anc durant quest onn.
Per persunas creschidas munta la franschisa la pli bassa a 300 francs, la pli auta a 2500 francs. Per uffants datti franschisas tranter 0 e 600 francs.
Resalva persunala
Uschespert che la franschisa è duvrada si, pajais Vus anc 10 pertschient da Voss custs da sanadad. Questa uschenumnada resalva persunala è limitada a 700 francs (uffants 350 francs) per onn. Vus stuais pia As participar a Voss custs da sanadad sin il pli cun la franschisa tschernida plus 700 francs.
La contribuziun a l’ospital
La contribuziun a l’ospital stuais Vus pajar en cas che Vus essas a l’ospital. Ella munta a 15 francs per di. Il motiv per questa contribuziun a l’ospital è che Vus spargnais en l’ospital custs che Vus avessas a chasa (per exempel per il da mangiar u per l’electricitad). Uffants, persunas giuvnas creschidas en scolaziun e dunnas en speranza na pajan nagina contribuziun a l’ospital.
Tgi che ha ina paja bassa u blers uffants, survegn eventualmain ina reducziun da la premia dal chantun. En blers chantuns infurmescha l’administraziun las persunas pertutgadas. En auters chantuns stuais Vus dumandar mintga onn sezza u sez la reducziun. Per detagls contactai per plaschair il post correspundent da Voss chantun.
Vus avais differentas pussaivladads per spargnar custs tar la premia:
Vus tschernis ina cassa da malsauns cun premias bassas.
Vus tschernis in model da medis da chasa u in auter model d’assicuranza cun ina premia bassa.
Vus tschernis in’auta franschisa e survegnis in rabat da premia.
En cas che Vus essas engaschada u engaschà per dapli che otg uras per emna, essas Vus assicurada u assicurà obligatoricamain cunter accidents. Pia na stuais Vus betg As assicurar anc ina giada cunter accidents tar la cassa obligatorica da malsauns.