Sche Vus abitais en Svizra, stuais Vus esser assicurada u assicurà tar ina cassa da malsauns svizra.
Cassa da malsauns per l’uffantin, immigraziun da l’exteriur
Vus avais trais mais temp per As assicurar tar ina cassa en cas che Vus essas nov en Svizra. Il medem termin vala suenter la naschientscha dad in uffant. Durant quests trais mais essas Vus respectivamain Voss uffantin gia assicurada u assicurà.
Tgi na dovra nagina cassa da malsauns?
Persunas pensiunadas da l’exteriur, studentas e students sco er diplomatas e diplomats na dovran sut tschertas circumstanzas nagina cassa da malsauns.
Il post correspundent en Voss chantun u en Vossa vischnanca approva eventualas excepziuns.
Cunfinarias e cunfinaris e la cassa da malsauns
Sco cunfinaria u cunfinari avais Vus la tscherna: En Svizra As pudais Vus assicurar tar Voss lieu da lavur u a Voss domicil en l'exteriur.
Libra tscherna da la cassa da malsauns
En la glista dad assicuranzas da malsauns admessas chattais Vus tut las cassas da malsauns. Vus pudais tscherner libramain tranter las cassas activas en Vossa regiun da domicil. As annunziai simplamain – en quai che pertutga l’assicuranza da basa èn las cassas obligadas dad acceptar tut las persunas interessadas.
Dal reminent: In uffant po er avair in’autra cassa da malsauns che ses geniturs.
Disdir la cassa da malsauns per la fin da l’onn
Per il solit pudais Vus midar Vossa cassa da malsauns la fin da l’onn. Perquai stuais Vus disdir Vossa assicuranza da basa en scrit. Vossa brev sto arrivar tar la cassa da malsauns fin ils 30 da november.
Dal reminent: Vossa cassa vertenta As communitgescha l’autezza da la premia per l’onn proxim fin la fin d’october – a temp per disdir en cas che Vus n’essas betg d’accord cun l’offerta. Gidaivel per cumparegliar las offertas è il calculader da premias.
En cas che Vus avais ina franschisa da 300 francs, pudais Vus er disdir l’assicuranza da basa per la fin da zercladur. Il termin da disditga importa trais mais.
Uschè midais Vus il model d’assicuranza
Per la fin da l’onn pudais Vus er midar il model d’assicuranza. Per quai sto Vossa brev arrivar tar la cassa da malsauns fin la fin da november. Sper il model «normal» datti ils suandants models d’assicuranza cun premias pli bassas:
Model da medis da chasa: Vus stuais (bunamain) adina ir sco emprim tar Vossa media da chasa u tar Voss medi da chasa. Sche necessari As assegna quella u quel ad ina spezialista u ad in spezialist.
Model dad HMO: Vus stuais bunamain adina ir sco emprim tar ina media u tar in medi da la pratica da gruppas tschernida da Vus. Sche necessari As assegna quella u quel ad ina spezialista u ad in spezialist.
Telmed: Avant (bunamain) mintga visita tar la media u tar il medi stuais Vus telefonar ad in tschert numer da telefon per survegnir in'emprima cussegliaziun medicinala al telefon.
La cassa da malsauns na sto betg acceptar Vus
Per il solit avais Vus dad emplenir in formular cun dumondas davart la sanadad avant che ina cassa da malsauns accepta Vus per in’assicuranza supplementara. I dependa da Vossas respostas sut tge cundiziuns che la cassa da malsauns accepta Vus. La cassa da malsauns po er refusar Vus per l’assicuranza supplementara.
Empleni il questiunari correctamain. Tar indicaziuns faussas na paja la cassa da malsauns pli tard eventualmain betg u excluda Vus da l’assicuranza.
Il meglier gia avant la naschientscha
Il meglier assicurais Vus Voss uffantin gia avant la naschientscha, sche Vus vulais in’assicuranza supplementara. Las cassas da malsauns acceptan l’uffant betg naschì per il pli senza questiunari davart la sanadad e senza cundiziuns.
Savens assicureschan ils geniturs lur uffants per tractaments dals dents (correctura da la posiziun dals dents). Er quest’assicuranza duessas Vus far baud avunda. Davent dad ina tscherta vegliadetgna pretendan las cassas da malsauns ina consultaziun precedenta.
Per il solit sco pachet
Cassas da malsauns offran assicuranzas supplementaras savens mo sco pachet. Examinai che Vus n’assicurais naginas prestaziuns dublamain. Quai vala spezialmain per assicuranzas da viadi. Savens essas Vus gia assicurada u assicurà – per exempel sur la carta da credit u en ina brev da protecziun da viadi.
Disditga delicata
Ponderai avant la disditga da Vossa assicuranza supplementara, sche Vus na vulais propi betg pli l’assicuranza. Pli tard na sto la cassa da malsauns betg pli acceptar Vus per l’assicuranza supplementara correspundenta. As infurmai ultra da quai davart ils termins da disditga. Infurmaziuns en chaussa chattais Vus en Voss contract d’assicuranza – u Vus dumandais Vossa cassa da malsauns.
Mintgamai l’atun publitgescha l’Uffizi federal da sanadad publica infurmaziuns detagliadas davart las premias da cassa da malsauns novas e davart la midada da la cassa da malsauns per l’onn proxim.
Obligaziun d'avair in'assicuranza: excepziuns e cas spezials
Posts correspundents per excepziuns en connex cun l’obligaziun d'avair in'assicuranza
Models d’assicuranza cun premias pli bassas ed ulteriuras pussaivladads da spargnar
Brevs da model per disdir la cassa da malsauns, per midar la franschisa e.u.v.
Midada da la cassa da malsauns, da la franschisa, dal model d'assicuranza – detagls