La renta da la AVS al mument da la vegliadetgna da renta ordinaria
La 1. pitga As garantescha in’entrada che tanscha per cuvrir ils basegns elementars durant il temp suenter il pensiunament.
Attualmente, per una persona sola, la rendita minima di vecchiaia è di 1’195.- franchi al mese e la rendita massima di 2390.- franchi.
L’autezza da la renta dependa tranter auter dals suandants facturs:
Dal dumber dad onns che Vus avais pajà contribuziuns a la AVS: En cas che Vus avais adina pajà Vossas contribuziuns a la AVS pudais Vus pretender ina renta entira. En cas che Vus avais mancanzas da contribuziun, survegnis Vus mo ina renta parziala. Sche Vus n'avais per exempel pajà naginas contribuziuns a la AVS durant in entir onn, vegn Vossa renta ad esser per radund 2,3 pertschient pli bassa.
Da Vossas entradas annualas en media: Pli auta che Vossa paja è, e pli autas èn las contribuziuns a la AVS che Vus stuais pajar. Sco consequenza vegn er Vossa renta ad esser pli auta. Per survegnir pli tard ina renta maximala, stuais Vus en media almain gudagnar 86 040 francs per onn.
Resguardai per plaschair: En cas che Vus essas maridada u maridà u vivais en in partenadi registrà, importa Vossa renta maximalmain 150 pertschient dad ina renta maximala per ina persuna singula. Surpassa la summa da Vossas duas rentas questa contribuziun maximala (actualmain 3585 francs), vegn Vossa renta reducida per questa contribuziun.
La renta da la AVS en cas dad in pensiunament anticipa u spustà
La vegliadetgna da renta ordinaria en Svizra è 64 onns per las dunnas e 65 onns per ils umens. Vus As pudais dentant er laschar pensiunar in u dus onns pli baud. En quest cas survegnis Vus ina renta reducida.
En cas che Vus retrais la renta in onn ordavant, vegn Vossa renta reducida per l’entira vita per 6,8 pertschient. Sche Vus retrais Vossa renta dus onns ordavant, importa la reducziun 13,6 pertschient.
En cas che Vus decidais da spustar Voss pensiunament per in fin maximalmain tschintg onns, vegn la renta mensila optimada per in supplement. L’autezza dependa da la durada, per la quala il pensiunament vegn spustà.
Valitaziun da la renta da la AVS
Vus pudais da tut temp pretender ina valitaziun da la renta che Vus avais dabun al pensiunament.
Resguardai per plaschair: Questa valitaziun è mo ina valur directiva, cunquai che la calculaziun sa basa sin las disposiziuns valaivlas tenor la lescha e sin Vossa situaziun professiunala actuala.
Empustar ina valitaziun da la renta futura online – assicuranzas socialas
Prestaziuns supplementaras
En cas ch’i n’è a maun da la renta da la AVS che Vus retschavais betg pussaivel per Vus da cuvrir ils custs da basa minimals, prevesa la 1. pitga prestaziuns supplementaras.
Ils meds d’agid dad ina renta da la AVS
En cas che Vus retschavais ina renta da la AVS, pudais Vus pretender meds d’agid da la AVS, per exempel channas, egliers, protesas u er ascensurs.
La renta da la LPP al mument da la vegliadetgna da renta ordiniaria
La renta da la 2. pitga vegn calculada sin basa da las contribuziuns che Vus avais pajà durant Vossa vita professiunala sco er tenor il reglament da la cassa da pensiun che administrescha Voss daners.
Cura che Vus cuntanschais la vegliadetgna da pensiun, survegnis Vus per ordinari las contribuziuns che Vus avais spargnà en furma dad ina renta da vegliadetgna mensila.
Vus As pudais er laschar pajar or in quart da la summa da Vossa 2. pitga sco retratga da chapital (unica) e retrair il rest sco renta mensila. Las singulas cassas da pensiun han er la pussaivladad da prevesair ina retratga dal chapital u la retratga dal chapital total enstagl d'ina renta.
La renta da vegliadetgna vegn calculada sin basa da la uschenumnada tariffa da conversiun. En quest connex vegn il chapital da la 2. pitga che Vus avais spargnà midà en ina renta per l’entira vita. Actualmain prescriva la lescha ina tariffa da conversiun minimala da 6,8 pertschient.
Exempel
Sche Vus avais spargnà in dabun da vegliadetgna da 200 000 francs durant il decurs dal temp e sche la tariffa da conversiun da la LPP munta a 6,8 pertschient, vegnis Vus a survegnir 13 600 francs per onn u 1133 francs per mais.
L’autezza dal chapital che Vus avais spargnà en la 2. pitga sco er las modalitads, co che Vus pudais retrair il chapital e la renta futura, vegnis Vus a savair tar Vossa instituziun da provediment.
La renta da la LPP en cas dad in pensiunament anticipà u spustà
En cas ch’il reglament da Vossa cassa da pensiun prevesa quai, pudais Vus retrair Vossa 2. pitga ordavant (il pli baud cun 58 onns) u spustar la retratga (sin il pli cun 70 onns).
En cas d'ina renta anticipada, è Vossa renta pli bassa. En cas d'ina retratga spustada, vegn la tariffa da conversiun per Vossa renta perencunter augmentada, quai che ha sco consequenza che Vus survegnis er rentas pli autas.
La renta che Vus vegnis a retschaiver in di vegnis Vus a savair tar Vossa instituziun da provediment.
Cun contribuziuns voluntaras a la 3. pitga engrondis Vus Voss dabun da vegliadetgna.
En general pudais Vus retrair Vossa 3. pitga mo cumplainamain sco pajament unic (il pli baud tschintg onns avant Vossa vegliadetgna da renta ordinaria e fin tschintg onns suenter la vegliadetgna da renta ordinaria, premess che Vus possias cumprovar che Vus lavurais vinavant).
As drizzai a Vossa instituziun, nua che Vus avais pajà contribuziuns per vegnir a savair l’autezza dal chapital spargnà, las pussaivladads d’ina retratga u l’autezza dal pajament en cas dad in pensiunament anticipà u spustà.
Envers l’autoritad fiscala stuais Vus declerar Vossas rentas dal mais totalas (AVS, LPP e provediment privat): En general vegnan las entradas totalas suttamessas a la taglia.
Sin prestaziuns da chapital da la 2. e da la 3. pitga (v.d. ils daners, che Vus avais retschet sco pajament unic) vegnan imponids taglia sin basa dad ina calculaziun speziala (tariffa da taglia speziala).
Sin las prestaziuns supplementaras tar la AVS e la AI perencunter na stuais Vus pajar nagina taglia.
Attests da taglia per las rentas da vegliadetgna
La fin da l’onn tramettan ils posts responsabels mintgamai automaticamain ils attests da taglia per Vossa renta da la AVS sco er per las rentas da la 2. e la 3. pitga. Uschia avais Vus avunda temp per emplenir la decleraziun da taglia.
Vus pudais empustar in attest da taglia tar Vossa cassa da cumpensaziun da la AVS u da tut temp durant l’onn tar Vossa instituziun da prevenziun professiunala.
Per infurmaziuns davart Vossa renta da la AVS persunala As drizzai a Vossa cassa da cumpensaziun da la AVS .
Sin la pagina d’internet da las assicuranzas socialas chattais Vus infurmaziuns detagliadas davart la vegliadetgna da renta flexibla e davart las consequenzas finanzialas dad in pensiunament anticipà u spustà.
La broschura prestaziuns supplementaras cuntegna tut las infurmaziuns necessarias davart quest tema.
Sin la pagina d’internet d’assicuranzas socialas chattais Vus infurmaziuns specificas davart ils meds d’agid dad ina renta da la AVS ed da la AI.
Sin la pagina Rentas a la AVS per persunas che vivan suenter il pensiunament a l’exteriur chattais Vus infurmaziuns detagliadas davart quest tema.
L’autoritad fiscala da Voss chantun As po tradir infurmaziuns specificas davart l’imposiziun da taglia e davart il chapital dal provediment da vegliadetgna.