Sche Vus vulais adoptar in uffant en Svizra As drizzai a l’autoritad centrala da Voss chantun da domicil. Quella As vegn ad infurmar davart l’exact proceder.
Sche Vus vulais adoptar in uffant a l’exteriur As cussegliain nus d’As drizzar ad in post da mediaziun spezialisà ed approvà da la Confederaziun. Quel vegn a sustegnair Vus tar il proceder cumplex en Svizra ed a l’exteriur.
L’autoritad chantunala responsabla examinescha, sche las premissas da basa per in’adopziun èn accumplidas. Ella examinescha oravant tut ils suandants puncts:
La differenza da vegliadetgna tranter Vus e l’uffant che Vus vulais adoptar sto esser almain 16 e dastga esser maximalmain 45 onns.
Vus stuais esser en cas d'As occupar da moda permanenta ed adequata da l’uffant e da sia scolaziun. Per examinar quai vegn ina experta u in expert da lavur sociala u da psicologia a s’entupar cun Vus pliras giadas. La finamira è quella da barattar infurmaziuns e da manar discurs.
L’adopziun sto servir al bainstar da l’uffant. Igl è er da resguardar il bainstar da Voss ulteriurs uffants.
L’uffant sto consentir a l’adopziun sch’el è gia en cas da far quai.
Vus stuais esser stads responsabels per la tgira e per l’educaziun da l’uffant durant almain in onn.
Sch’ils geniturs biologics da l’uffant èn enconuschents e vivan anc, ston els consentir a l’adopziun, danor ch’els èn absents per in temp pli lung cun dimora nunenconuschenta ubain ch’els èn permanentamain incapabels da giuditgar. Ils geniturs biologics dastgan consentir a l’adopziun il pli baud sis emnas suenter la naschientscha da l’uffant. Lur consentiment pon els revocar durant las sis emnas che suondan.
Sche Vus vulais adoptar in uffant sco pèr, stuais Vus ademplir las cundiziuns da basa per tut las adopziuns. Ultra da quai vala il suandant:
Vus essas maridads
Vus vivais ensemen dapi almain trais onns.
Vus avais tuts dus almain 28 onns.
Vus avais Voss domicil en Svizra.
Sche Vus vulais adoptar in uffant sco persuna suletta, stuais Vus ademplir las cundiziuns da basa per tut als adopziuns. Ultra da quai vala il suandant:
Vus avais almain 28 onns.
Vus essas nubila u nubil
Sche Vus essas maridada u maridà u sche Vus vivais en in partenadi registrà, pudais Vus adoptar sco persuna suletta in uffant:
sche Vus essas separada u separà uffizialmain da Voss um u da Vossa dunna dapi almain trais onns;
sche Vossa partenaria u Voss partenari è permanentamain incapabla u incapabel da giuditgar;
sche Vossa partenaria u Voss partenari è absenta u absent e senza domicil fix dapi almain dus onns.
Vus pudais adoptar ils uffants da Vossa partenaria u da Voss partenari, sche Vus ademplis las cundiziuns da basa per tut las adopziuns e sche – ultra da quai – Vus e Vossa partenaria u Voss partenari:
essas maridads,
vivais en in partenadi registrà u
vivais effectivamain ensemen.
Plinavant stuais Vus avair vivì ensemen cun Vossa partenaria u Voss partenari dapi almain trais onns.
Sche Vus essas omosexuala u omosexual, pudais Vus adoptar in uffant sco persuna suletta (cundiziuns guardar qua survart).
Sche Vossa partenaria u Voss partenari ha la medema schlattaina sco Vus, na pudais Vus dentant betg adoptar in uffant sco pèr.
Dapi l’onn 2018 èsi dentant pussaivel d’adoptar ils uffants (biologics u adoptads) da Vossa partenaria u da Voss partenari (cundiziuns guardar qua survart).
Vus pudais adoptar ina persuna maiorenna, sche:
questa persuna ha vivì durant almain in onn tar Vus cura ch’ella è anc stada minorenna,
questa persuna è dependenta da tgira permanenta, ha vivì almain in onn tar Vus e sche Vus l’avais tgirada (er sch’ella è gia stada maiorenna durant quest temp), u
sch’i èn avant maun ulteriurs motivs gravants e la persuna che Vus vulais adoptar ha vivì almain in onn tar Vus.
Ultra da quai valan las medemas disposiziuns sco per l’adopziun da persunas minorennas (danor ch’il consentiment dals geniturs n’è betg necessari).