En mintga chantun datti in post d’infurmaziun che po gidar, sche Vus essas vegnida adoptada u adoptà e sche Vus vulais far retschertgas davart Vossa derivanza. Vus pudais As drizzar al post d’infurmaziun da Voss chantun da domicil ubain – en segunda prioritad – al post d’infurmaziun da quel chantun, nua che l’adopziun è succedida (adressas sutvart).
Sche Vus essas vegnida adoptada u adoptà, pudais Vus dumandar tar il post d’infurmaziun chantunal infurmaziuns davart Voss geniturs biologics e davart lur descendents directs. Vus avais il dretg da prender invista da Voss documents d’adopziun. Per survegnir questas infurmaziuns stuais Vus dentant esser maiorenna u maioren, danor sche Vus pudais far valair in interess spezial (per exempel en cas d’ina malsogna ertaivla suspectada).
Il post chantunal contactescha Voss geniturs biologics ed als infurmescha davart Vossa dumonda. Quai è natiralmain pussaivel mo, sch’ils geniturs vegnan chattads a maun da las infurmaziuns en ils documents d’adopziun. Sch’ils documents na cuntegnan naginas infurmaziuns davart lur identitad – per exempel sche Vus essas in uffant chattà – n’è quai dentant betg pussaivel.
Tenor basegn gida il post chantunal er d’organisar ina scuntrada cun Voss geniturs biologics. Quels n’èn dentant betg obligads da sa scuntrar cun Vus. Els n’As ston er betg dar ulteriuras infurmaziuns.
Sche Vus essas vegnida adoptada u adoptà e sche Vus vulais chattar ils auters uffants da Voss geniturs biologics, ubain sch’in da Voss fragliuns è vegnì adoptà e sche Vus vulais chattar el, è quai pussaivel mo sut las suandantas cundiziuns:
Igl è pussaivel da chattar ils fragliuns biologics. Quai è il cas, sch’ils geniturs biologics eran burgais svizzers e sche lur uffants èn registrads en il register dal stadi civil.
Ils fragliuns èn maiorens.
Ils fragliuns èn d’accord che lur identitad vegn communitgada.
Tar ils posts chantunals pudais Vus adina dumandar infurmaziuns davart uffants che Vus avais dà liber per l’adopziun. Vus avais dentant mo il dretg sin infurmaziuns, sche l’uffant pertutgà dat ses consentiment. Sch’in uffant è anc minoren, sto el esser abel da giuditgar ed ils geniturs adoptivs ston consentir a la communicaziun da l’identitad.
Per retschertgas davart l’atgna identitad èsi da pajar taxas administrativas. L’import variescha tenor chantun. Per regla sa tracti d’in pèr tschient francs. L’import dependa er dal gener da la retschertga: spira invista d’actas, spediziun d’infurmaziuns, accumpagnament tras ina persuna da l’uffizi da servetsch social per giuvenils e.u.v.
As infurmai directamain tar ils posts chantunals responsabels davart las taxas.