La gronda part dals chantuns incasseschan ina taglia sin donaziuns. Cun questa taglia duai vegnir impedì ch’i vegnan guntgids auters geners da taglia cun ina donaziun, spezialmain la taglia sin l’ierta.
La taglia sin donaziuns vegn per exempel incassada sin il suandant:
imports da daners a partir d’ina tscherta summa
donaziuns da proprietad funsila
objects da valur sco ovras d’art
donaziuns da prestaziuns d’assicuranza ch’èn da pajar durant la vita da l’assicurada u da l’assicurà
retratgas anticipadas da l’ierta
donaziuns en furma da cessiun u da consegna da dretgs (p.ex. dretg da giudida).
La taglia sin donaziuns sto pajar, tgi che survegn ina donaziun.
Per regla èn ils conjugals, las persunas che vivan en in partenadi registrà e lur descendents (uffants e biadis) deliberads da la taglia. Er deliberads da la taglia èn figliastras e figliasters sco er uffants da tgira. Quai vala dentant mo en ils chantuns, en ils quals quests uffants han ils medems dretgs sco ils agens uffants.
En la gronda part dals chantuns stuais Vus annunziar la donaziun aifer in tschert temp a l’administraziun chantunala da taglia.
As drizzai per ulteriuras infurmaziuns a l’autoritad chantunala da taglia da Voss chantun da domicil.
L’autezza da la tariffa da taglia e cun quai da la taglia dependa per regla dal suandant:
da la valur da la facultad retschavida tras la donaziun
e/u dal grad da parentella da la donatura u dal donatur cun la persuna che survegn la donaziun: pli datiers parent ch’ins è, e pli bassa che la tariffa da taglia è.
Tgi che fa ina donaziun ad in’organisaziun d’utilitad publica, po en tscherts cas deducir parzialmain u cumplainamain l’import da la donaziun en sia decleraziun da taglia. Ulteriuras infurmaziuns davart quest tema chattais Vus en las Infurmaziuns davart la decleraziun da taglia.
Per infurmaziuns davart la taglia sin donaziuns As drizzai a l’administraziun chantunala da taglia dal domicil da la donatura u dal donatur. Autoritads chantunalas da taglia – Taglia sin donaziuns
Documentaziun da l’Administraziun federala da taglia (dossier infurmaziuns da taglia e mappina da taglia).
Sche Vus survegnis ina immobiglia tras la donaziun, è la vischnanca, nua che la immobiglia sa chatta, Voss contact.
- Nagins resultats