Voss dretgs a la plazza da lavur
Durant la gravidanza profiteschan dunnas da dretgs spezials a la plazza da lavur. Las mesiras las pli impurtantas che Voss patrun duess prender èn las suandantas:
Voss temp da lavur na dastga betg surpassar nov uras per di, er sche Voss contract da lavur prevesa quai.
Vus dastgais mo cuntinuar cun lavurs grevas u privlusas, sche Vossa activitad n’è nagina ristga per Vus e per Voss uffant. Voss patrun sto laschar far in'analisa da la ristga per garantir, ch’i n’exista nagin privel per Vus e per l’uffant betg anc naschì.
En cas d'ina periclitaziun sto Voss patrun prender mesiras da protecziun adattadas u porscher a Vus ina activitad equivalenta, ma segira e betg memia stentusa.
Sche Vus lavurais normalmain tranter las 20.00 e las 06.00, pudais Vus pretender durant ils emprims sis mais da la gravidanza ch’igl As vegnia attribuida ina lavur equivalenta durant il di.
Durant las otg emnas avant la naschientscha è la lavur da notg per dunnas en speranza scumandada cumplettamain.
Vus stuais avair la pussaivladad d'As metter giu e da ruassar durant il di en ina stanza separada.
Absenza e paja
Sche Vus na pudais betg ir a lavurar durant Vossa gravidanza, survegnis Vus Voss salari usità, sche Vus preschentais in attest d’ina media u d’in medi, sco en cas d'ina absenza pervia malsogna - Vossa paja usitada.
Vus As pudais perstgisar a la lavur cun infurmar Vossa superiura u Voss superiur. Ma faschai attenziun: Senza in attest d’ina media u d’in medi n’è Voss patrun betg adina obligà da pajar vinavant il salari.
Sche Vus lavurais durant la notg ed il patrun n’As po betg porscher ina lavur equivalenta durant il di, essas Vus dispensada da la lavur e pudais pretender 80 pertschient da Voss salari. Il medem vala per lavurs stentusas u privlusas.
Uschespert che Vus turnais dal congedi da maternitad, avais Vus il dretg da pretender tschertas disposiziuns organisatoricas per proteger Vossa sanadad, che As pussibiliteschan sin giavisch er da tezzar Voss uffant.
En detagl:
Vossa lavur quotidiana na dastga betg surpassar nov uras, er sche Voss contract da lavur prevesa quai.
Il temp necessari per tezzar u per pumpar giu il latg As sto star a disposiziun. Quest temp quinta sco temp da lavur pajà (almain 30 minutas tar in di da lavur da fin a 4 uras; 60 minutas durant in di da lavur da dapli che 4 uras; 90 minutas durant in di da lavur da dapli che 7 uras).
Sin dumonda pudais Vus vegnir deliberada da lavurs grevas e privlusas.
Voss patrun na po betg schliar la relaziun da lavur durant Vossa gravidanza sco er durant las emprimas 16 emnas suenter la naschientscha da Voss uffant.
El As po dentant disdir en cas che Vus vegnis en speranza durant il temp da prova. Er per motivs gravants (p.ex. en il cas d'enguladitsch) pudais Vus vegnir relaschada u che la disditga succeda en enclegientscha vicendaivla tranter Vus e Vossa superiura u Voss superiur.
Sco lavuranta pudais Vus da tut temp disdir il contract, er durant la gravidanza e durant il congedi da maternitad.
Per plaschair resguardai: Il bab da l’uffant po vegnir relaschà durant il congedi da paternitad.
Dapli davart il tema protecziun da la maternitad e mund da lavur vegnis Vus a savair en la broschura « Protecziun da la maternitad – infurmaziun per dunnas en speranza, mammas che tezzan lur uffant e pagliolancas en ina relaziun da lavur » dal Secretariat da stadi per l’economia (SECO).
Infurmaziuns davart il congedi da maternitad e da paternitad chattais Vus sin la pagina congedi da maternitad e da paternitad.
Infurmaziuns davart la tgira d’uffants ordaifer la famiglia u davart absenzas a la plazza da lavur pervia da malsogna dals uffants chattais Vus sin la pagina tgira d’uffants ordaifer la famiglia.
Ulteriuras infurmaziuns areguard la disditga chattais Vus sin la pagina disditga.