Vus avais il dretg da supplements da famiglia, sche Vus essas emploiada u emploià u avais in'activitad da gudogn independenta, sche Vus n'avais betg in'activitad da gudogn e sche Vossas entradas suttamessas a la taglia èn bassas. (L’import minimal po variar tenor chantun).
Sche Vus essas registrada u registrà sco dischoccupada u dischoccupà n’avais Vus nagin dretg da supplements da famiglia. Vus vais dentant il dretg d’in supplement che vegn vitiers las diarias da dischoccupaziun.
Da resguardar: Er sche Vus essas cunfinaria u cunfinari ubain stagiunaria u stagiunari avais Vus sut tschertas cundiziuns il dretg da supplements da famiglia.
Per mintga uffant survegnis Vus davent da la naschientscha fin al 16. onn da vita accumplì (u fin al 20. onn da vita accumplì per uffants che na pon betg lavurar per motivs da sanadad) in supplement d’uffants en l’autezza da 200 francs per mais. Per uffants en scolaziun en la vegliadetgna da 15 fin 25 onns survegnis Vus supplements da scolaziun en l’autezza da 250 francs per mais.
Ils chantuns (ed ils patruns) pon pajar supplements pli generus ed er supplements spezials che vegnan pajads tar la naschientscha u tar l’adopziun d'in uffant.
Per mintga uffant avais Vus be ina giada il dretg sin supplements da famiglia. Cun auters pleds: Sche Vus e Vossa partenaria u Voss partenari lavurais omadus, alura vegnan ils supplements pajads be ad in genitur.
Supplements da famiglia na vegnan betg pajads automaticamain. Vus stuais far ina dumonda:
Sche Vus essas emploiada u emploià prenda Voss patrun las mesiras necessarias per che Vus survegnias ils supplements. Sch’el na fa betg quai, stuais Vus far ina dumonda per supplements da famiglia tar Voss patrun. Il patrun trametta vinavant Vossa dumonda a la cassa da cumpensaziun per famiglias. Sche la cassa accepta la dumonda, paja Voss patrun ils supplements mintga mais ensemen cun la paja.
Sche Vus avais in'activitad da gudogn independenta, stuais Vus far persunalmain ina dumonda per supplements da famiglia tar la cassa da cumpensaziun per famiglias.
Sche Vus n'avais betg in'activitad da gudogn, stuais Vus far Vossa dumonda a la cassa da cumpensaziun per famiglias chantunala che vegn manada da las cassas da cumpensaziun da l’AVS.
Resguardai per plaschair:
Sche Vus avais emblidà da far ina dumonda per supplements da famiglia u sche Vus n’avais betg savì che Vus avais il dretg sin supplements, pudais Vus far ina dumonda da supplements cun effect retroactiv entaifer maximalmain tschintg onns.
Ulteriuras infurmaziuns davart ils supplements da famiglia chattais Vus sin las paginas Dumondas e respostas davart supplements da famiglia, Geners e tariffas dals supplements da famiglia e sin la pagina Supplements da famiglia da la pagina d'internet dal post d’infurmaziun da l’AVS/AI.
Sche Vus avais uffants che vivan a l’exteriur metta l’Uffizi federal d’assicuranzas socialas UFAS a disposiziun la suandanta pagina cun infurmaziuns: Uffants cun domicil a l’exteriur.
Infurmaziuns generalas davart l’andament tar la naschientscha u tar l’adopziun d'in uffant chattais Vus sin las paginas Naschientscha ed adopziun.