Il sistem dal provediment da vegliadetgna svizzer prevesa ina renta per survivents per evitar ch’ina dunna, in um, ina partenaria registrada, in partenari registrà u uffants sa chattian nunspetgadamain en ina greva situaziun economica, sche la consorta, il consort u in genitur mora.
L’autezza da la renta dependa dal dumber dad onns da contribuziun, da l’autezza da las entradas da gudogn e da las bunificaziuns d’educaziun u da las bunificaziuns da tgira da la persuna defuncta.
Sche Vossa dunna, Voss um, Vossa partenaria registrada, Voss partenari registrà u in genitur ch'è morta u mort ha pajà tut las contribuziuns a la AVS – quai vul dir a partir dal 1. da schaner suenter avair cuntanschì il 20. onn da vegliadetgna fin a la mort –, avais Vus il dretg sin ina renta cumplaina. En cas da mancanzas da contribuziuns tar la AVS survegnis Vus ina renta parziala.
Cun ina renta cumplaina avais Vus en il cas normal il dretg da survegnir las suandantas contribuziuns, tut tenor l’entrada media da la persuna defuncta:
mindestens CHF/Monat | höchstens CHF/Monat | |
|---|---|---|
Witwen- oder Wittwerrente | 956.- | 1912.- |
Waisenrente | 479.- | 956.- |
Sche Vus retirais ina renta AVS u ina renta d’invaliditad, survegnis Vus – en cas che Vus daventais vaiva u vaiv – in supplement da 20 pertschient sin Vossa renta da la AVS/AI. La summa da la renta e dal supplement na dastga betg esser pli auta che la renta maximala.
La cassa da cumpensaziun da la AVS da la persuna defuncta As po inditgar exactamain, quant auta che la renta vegn ad esser en Voss cas.
Ina renta per survivents stuais Vus dumandar tar la cassa da cumpensaziun, nua che la persuna defuncta ha pajà las contribuziuns sco ultim.
ll formular d’annunzia per la renta, che Vus pudais chargiar giu online, stuais Vus inoltrar tar la cassa da cumpensaziun.
En cas che la persuna defuncta ha pajà las contribuziuns a la AVS per part en Svizra e per part en in u en plirs stadis commembers da la UE u da la AECL, pudais Vus trametter il formular d’annunzia per la renta a Voss ultim pajais da domicil. En quest cas vegnan activadas automaticamain las proceduras en ils auters pajais.
Sche Vus abitais a l’exteriur, As stuais Vus drizzar a la cassa da cumpensaziun svizra per vegnir a savair il proceder exact
Per retschaiver ina renta per vaivas, per vaivs u per orfens stuais Vus ademplir tschertas premissas. Sin la pagina d’internet da l’Uffizi central da cumpensaziun chattais Vus las premissas correspundentas per il dretg.
La broschura dal post d’infurmaziun da la AVS rentas per survivents da la AVS cuntegna infurmaziuns detagliadas davart quest tema.
Il provediment professiunal (LPP, 2. pitga) po prevair ina renta supplementara per survivents. Infurmaziuns detagliadas davart quest tema chattais Vus sin la pagina "La 2. pitga". Vus pudais er contactar l'instituziun da provediment da la persuna defuncta.