Intent da la 3. pitga
Sche Vus vulais cumplettar Vossa 1. e 2. pitga e garantir uschia che Vus survegnias suenter il pensiunament ulteriurs daners, pudais Vus avrir voluntarmain ina 3. pitga. I dat dus tips da la 3. pitga: il provediment individual lià (pitga 3a) ed il provediment individual nunlià (pitga 3b).
Provediment individual lià (pitga 3a)
Cun la pitga 3a pudais Vus accumular durant Vossa vita professiunala fin al pensiunament in dabun da spargn tar ina banca u tar in’assicuranza.
Las caracteristicas las pli impurtantas da la pitga 3a:
Vus pudais pajar mintg’onn ina summa maximala sin Voss conto.
Ils tschains èn pli auts che tar in conto da spargn.
Las contribuziuns che Vus pajais pon vegnir deducids mintg’onn da la taglia.
Per la retratga dal dabun valan tschertas disposiziuns.
Sch'ins retira il dabun, ston ins pajar ina taglia unica che sa drizza tenor las entradas il mument da la retratga.
Provediment individual nunlià (pitga 3b)
Tar la pitga 3b sa tracti da deposits da spargn en furma da daner contant, da cudeschet(s) da spargn, d'assicuranzas da vita u d'investiziuns.
Las caracteristicas las pli impurtantas da la pitga 3b:
Vus pudais pajar mintg’onn contribuziuns d'ina summa tenor plaschair.
Il dabun spargnà stuais Vus inditgar en la decleraziun da taglia.
En general sto mintg’onn vegnir pajà taglia per il dabun.
Vus pudais laschar pajar or ils daners da tut temp.
Vus na stuais pajar naginas taglias supplementaras, sche Vus retirais ils daners spargnads.
En ils suandants cas pudais Vus avrir e cuntinuarcun ina pitga 3a:
Vus pajais contribuziuns a la 2. pitga (emploiadas ed emploiads).
Vus n’essas betg assicurada u assicurà tar ina instituziun da provediment tenor la LPP (persuna cun activitad da gudogn independenta).
Vus abitais a l’exteriur, lavurais dentant en Svizra (p.ex. cunfinarias e cunfinaris).
Vus survegnis diarias d'ina assicuranza svizra cunter la dischoccupaziun.
Vus essas ina persuna assicurada cun ina invaliditad parziala cun entradas suttamessas a la AVS.
Sche Vus lavurais sur la vegliadetgna da renta ordinaria or, pudais Vus cuntinuar cun pajar las contribuziuns fin 5 onns suenter Voss 65. anniversari (umens) u suenter Voss 64. anniversari (dunnas).
Vus pudais er pajar vinavant contribuziuns, sche Vus interrumpais temporarmain l'activitad da gudogn (p.ex. servetsch civil u militar, dischoccupaziun, malsogna).
Per la pitga 3b na datti naginas premissas spezialas.
Las instituziuns da provediment As pon infurmar detagliadamain davart la conclusiun d'ina 3. pitga.
Vus pudais pajar mintg’onn ina summa maximala en la pitga 3a.
Per emploiadas ed emploiads èn quai l’onn 2022 maximalmain 6883 francs. Per persunas cun in'activitad da gudogn independenta senza 2. pitga èn quai fin 20 pertschient da las entradas e maximalmain 34 416 francs.
Per la pitga 3b na datti naginas limitas maximalas ad onn.
Sche Vus As decidais per ina pitga 3a, pudais Vus profitar d'avantatgs fiscals: Vus pudais numnadamain deducir las summas pajadas da la decleraziun da taglia annuala.
Emploiadas ed emploiads pon deducir la summa maximala per l’onn fiscal current (summa l’onn 2022: 6883 francs).
Persunas cun in'activitad da gudogn independenta senza 2. pitga pon deducir fin 20 pertschient da las entradas e maximalmain 34 416 francs (summa l’onn 2022).
Resguardai per plaschair: tar il pajament dal dabun èsi da pajar ina taglia pauschala unica.
Per la pitga 3b na datti per regla nagins avantatgs fiscals.
Persuenter na stuais Vus – auter che tar la pitga 3a – pajar nagina taglia, sche Vus laschais pajar or il dabun total spargnà.
Vossa instituziun da provediment u l’autoritad fiscala da Voss chantun As po infurmar en detagl davart quest tema.
Normalmain As pudais Vus laschar pajar or ils daners da la 3. pitga il mument da Voss pensiunament u – il pli baud – 5 onns avant la vegliadetgna da renta ordinaria (64 onns per dunnas e 65 onns per umens) .
En ils suandants cas excepziunals avais Vus la pussaivladad da retrair anticipadamain il chapital:
Vus planisais da cumprar u da bajegiar proprietad d’abitar.
Vus bandunais definitivamain la Svizra.
Vus avais l’intent da cumenzar in'activitad da gudogn independenta.
Vus avais l’intent d'As deditgar ad ina nova activitad independenta.
Vus vulais cumprar onns da contribuziun supplementars tar ina instituziun da provediment da la 2. pitga.
Vus retschavais ina renta entira da l’assicuranza d’invaliditad (AI) e la ristga d’invaliditad n’è betg assicurada.
Sche Vus decidais da lavurar sur la vegliadetgna da renta ordinaria or (64 resp. 65 onns), pudais Vus pajar vinavant contribuziuns e spustar la retratga per maximalmain 5 onns.
En cas d'ina retratga As stuais Vus laschar pajar or l'entir dabun en ina giada.
La retratga dal chapital da provediment da la pitga 3b n’è betg liada a cundiziuns e po avair lieu da tut temp.
Vossa instituziun da provediment As po infurmar en detagl davart las cundiziuns e las modalitads per ina retratga dal chapital.
Sin la pagina ll sistem da provediment vegn explitgà, co che las trais pitgas funcziunan, che furman il provediment da vegliadetgna svizzer.
Infurmaziuns detagliadas davart il tema dal provediment da vegliadetgna chattais Vus sin la pagina davart Il provediment individual lià (pitga 3a) da l’Uffizi federal d’assicuranzas socialas u en la broschura Il provediment da vegliadetgna svizzer che Vus pudais chargiar giu.
Vossa instituziun da provediment u l’autoritad da taglia da Voss chantun As po infurmar en detagl davart ils avantatgs fiscals d'ina pitga 3a u 3b.