Lavur da notg temporara e permanenta
Tenor la lescha èsi scumandà en Svizra dad engaschar lavurantas e lavurants tranter las 23.00 e las 6.00. Tgi che – sco patrun – vul tuttina engaschar lavurantas e lavurants durant questa perioda, dovra la permissiun sco er il consentiment da la lavuranta u dal lavurant.
Tar la lavur da notg na dastga il temp da lavur quotidian per la lavuranta u il lavurant betg surpassar nov uras. El sto – inclusiv las pausas – esser tranter in spazi da temp da diesch uras.
Per plaschair resguardai: En Svizra vegni differenzià tranter lavur da notg temporara e lavur da notg permanenta.
Ins discurra dad ina lavur da notg temporara, sch’ella na cumpiglia betg dapli che trais mais per onn chalendar en cas dad engaschaments sporadics u periodics u sch’ella mussa in caracter unic en cas dad engaschaments temporalmain limitads fin a sis mais per onn chalendar.
Dad ina lavur da notg permanenta discurran ins, sch'ella surpassa la dimensiun temporala numnada.
Dumandar ina permissiun
Sche Vus sco patrun vulais manar en lavur da notg temporara, stuais Vus inoltrar ina dumonda per ina permissiun da temp da lavur argumentà tar l’autoritad chantunala responsabla.
Sche Vus vulais introducir lavur da notg per in temp pli lung, stuais Vus dumandar ina permissiun per lavur da notg permanenta. Inoltrai Vossa dumonda sur EasyGov.swiss – Il spurtegl online per interpresas.
Resguardai per plaschair: Fa ina lavuranta u in lavurant lavur da notg durant 25 notgs u dapli per onn, lura ha ella u el il dretg da laschar examinar medicinalmain la qualificaziun per la lavur da notg. En tscherts cas è ina tala consultaziun medicinala obligatorica, per exempel tar glieud giuvna che vegn engaschada tranter la 1.00 e las 6.00 u tar lavurantas e lavurants che lavuran sut cundiziuns difficilas (temperaturas extremas, canera, vibraziuns, lavur corporala, lavur singula …). A partir da 45 onns pon lavurantas e lavurants pretender che la consultaziun vegnia manada tras mintg’onn.
Lavur da notg temporara
Lavurantas e lavurants che lavuran durant maximalmain 25 notgs per onn chalendar tranter las 23.00 e las 6.00 pon pretender in supplement da paja dad almain 25 pertschient.
Lavur da notg permanenta
Lavurantas e lavurants che fan durant 25 u dapli notgs per onn chalendar lavur da notg pon pretender ina cumpensaziun da 10 pertschient dal temp, durant il qual els han prestà lavur da notg.
Igl n’è betg admissibel da remplazzar quest supplement da temp tras in supplement da paja, perquai ch’il temp da paus da cumpensaziun serva a la lavuranta u al lavurant per sa revegnir e per prender suenter la mancanza da sien.
Il SECO metta a disposiziun in fegl d’infurmaziun, nua ch’i vegn explitgà detagliadamain l’indemnisaziun en cas da lavur da notg permanenta.
Lavur da dumengia temporara e permanenta
En general è la lavur da dumengia scumandada en Svizra. Tgi che sco patrun vul tuttina engaschar lavurantas e lavurants la dumengia, dovra ina permissiun sco er il consentiment da la lavuranta u dal lavurant.
Resguardai per plaschair: En Svizra vegni differenzià tranter la lavur da dumengia temporara e la lavur da dumengia permanenta.
Ins discurra da lavur da dumengia temporara, sch’ella na cumpiglia betg dapli che sis dumengias ad onn u sch’ella cumpiglia – en cas dad engaschaments temporalmain limitads da fin a trais mais – betg dapli che dudesch dumengias ed ha in caracter unic. Lavur durant in firà tenor lescha vala er sco lavur da dumengia.
Da lavur da dumengia permanenta discurran ins, sch’ella cumpiglia dapli che sis u dapli che dudesch dumengias – inclus firads tenor lescha.
Dumandar ina permissiun
Per che Vus sco patrun dastgias engaschar temporarmain lavurantas e lavurants la dumengia, stuais Vus inoltrar ina dumonda per ina permissiun da temp da lavur tar l’autoritad chantunala responsabla. Questa autoritad As dat las infurmaziuns necessarias ed ils formulars necessaris per inoltrar la dumonda.
Sche Vus vulais dumandar ina permissiun per lavur da dumengia permanenta, inoltrai Vossa dumonda sur EasyGov.swiss – Il spurtegl online per interpresas.
Lavur da dumengia temporara
Lavurantas e lavurants che lavuran fin sis dumengias ad onn, pon pretender in supplement da paja da 50 pertschient ed ina cumpensaziun da temp. Questa cumpensaziun variescha tut tenor situaziun sco suonda:
Lavur da dumengia dad ina durada fin a tschintg uras sto vegnir cumpensada entaifer quatter emnas tras temp liber da la medema durada.
Dura la lavur da dumengia pli ditg che tschintg uras, sto vegnir concedì per l’emna precedenta u suandanta in di da paus dad almain 24 uras successivas (supplementarmain al temp da paus quotidian, quai vul dir al temp da paus tranter dus dis da lavur, che sto importar almain 11 uras. En tut sto la cumpensaziun pia importar 35 uras).
Lavur da dumengia permanenta
Lavurantas e lavurants che fan lavur da dumengia permanenta, pon pretender ina cumpensaziun da temp. Questa cumpensaziun variescha tut tenor situaziun sco suonda:
Lavur da dumengia dad ina durada fin a tschintg uras sto vegnir cumpensada entaifer quatter emnas tras temp liber da la medema durada.
Dura la lavur da dumengia pli ditg che tschintg uras, sto vegnir concedì per l’emna precedenta u per l'emna suandanta in di da paus dad almain 24 uras successivas (supplementarmain al temp da paus quotidian, quai vul dir al temp da paus tranter dus dis da lavur, che sto importar almain 11 uras. En tut sto la cumpensaziun pia importar 35 uras).
I n’è betg admissibel da remplazzar questa cumpensaziun da temp tras in supplement da paja, perquai ch’il temp da paus da cumpensaziun serva a la lavuranta u al lavurant a sa revegnir ed a recuperar la recreaziun da dumengia e da firads persa.
En tschertas professiuns ed en tschertas categorias da professiun pon lavurantas e lavurants senza permissiun vegnir engaschads la notg e la dumengia. Uschia per exempel en il sectur da la sanadad, en la restauraziun, dentant er en kioscs, en pasternarias, en teaters ed en redacziuns da gasettas.
Il SECO metta a disposiziun ina glista actuala da las categorias da professiun che pussibiliteschan lavur da notg e da dumengia senza pemissiun.
Sin la pagina d’internet dal SECO chattais Vus respostas sin las dumondas las pli frequentas davart la lavur da notg e la lavur da dumengia.
Per ulteriuras infurmaziuns davart la lavur da notg e da dumengia, davart permissiuns, davart indemnisaziuns, davart limitas da vegliadetgna, davart excepziuns e.u.v. As pudais Vus drizzar a l’autoritad responsabla da Voss chantun.
Per Vossa facilitaziun administrativa – Inoltrai Vossa dumonda da temp da lavur sur EasyGov.swiss – Il spurtegl online per interpresas.