Cun ina disposiziun dal pazient pudais Vus definir tge tractament medicinal che Vus giavischais suenter in grev accident u durant il stadi final d’ina malsogna e tgenin betg.
Cun quai garantis Vus che Vossa voluntad sco pazienta u pazient vegn er lura anc resguardada, sche Vus na pudais betg pli exprimer Vossa voluntad.
Vus n’essas betg obligada u obligà da far ina disposiziun dal pazient. La disposiziun è persunala e gratuita. Vus pudais far e midar ella da tut temp.
Vus pudais eleger tranter duas sorts da disposiziun dal pazient: ina che sa concentrescha sin l’essenzial ed ina che definescha tut tenor situaziun tge mesiras medicinalas che dastgan vegnir prendidas. Vus agis suandantamain:
Chargai giu in model, per exempel il formular da la Federaziun dals medis svizzers en la versiun curta u detagliada. Er numerusas autras uniuns porschan exempels e models.
Empleni il model elegì, al datai e suttascrivai.
Surdai la disposiziun dal pazient ad ina persuna da confidenza ubain a la media u al medi da chasa. Vus pudais er inditgar nua ch’il team da tractament chatta il document cura ch’i fa basegn.
Tegnai en Vossa bursa ina indicaziun pertutgant Vossa disposiziun dal pazient e pertutgant il lieu da deposit. Vus pudais er laschar registrar il lieu da deposit sin la carta d’assicuranza.
Na targlinai betg d’As laschar cussegliar per emplenir il model – per exempel d’ina media ch'è responsabla u d’in medi ch'è responsabel per Vus. Ina disposiziun dal pazient clera e confurma a Voss giavischs paisa en cas d’ina decisiun dapli e provochescha main dumondas d’interpretaziun.
La disposiziun dal pazient duess vegnir examinada regularmain ed en cas da basegn vegnir adattada. La FMH recumonda da far in’examinaziun mintga dus onns. N’emblidai betg da datar e da suttascriver la nova versiun.
Vus na stuais betg exnum esser sauna u saun sco in pesch, ma Vus stuais esser abla u abel da giuditgar.
La disposiziun dal pazient sto correspunder a Vossa voluntad per propi e na dastga betg esser resultada sut pressiun.
Per las medias responsablas ed ils medis responsabels èn mo las disposiziuns dal pazient liantas, las qualas èn datadas e suttascrittas a maun.
Models da la Federaziun dals medis svizzers (en la versiun curta u detagliada)
Infurmaziuns davart la disposiziun dal pazient e davart la cussegliaziun correspundenta da la Societad svizra da medischina e tgira palliativa