Annunzia en Svizra
La perdita u l’engol d’in document d'identitad stuais Vus annunziar a la polizia. Cun questa annunzia vegn Voss passaport u Vossa carta d’identitad annullada automaticamain. Er sche Vus chattais puspè Voss document, na pudais Vus betg pli duvrar el e stuais dar giu el a l’uffizi da passaport da Voss chantun da domicil.
Annunzia a l’exteriur
La perdita u l’engol d’in document d'identitad stuais Vus annunziar a la polizia ed infurmar l’ambassada svizra u il consulat svizzer dal pajais, nua che Vus As chattais. L’ambassada u il consulat vegn a dar vinavant questa infurmaziun a la Polizia federala en Svizra.
Suenter pudais Vus empustar in nov document. Sche Vus duvrais urgentamain in document, per exempel per turnar en Svizra, pudais Vus laschar far in passaport provisoric.
En Svizra
Suenter l’annunzia a la polizia pudais Vus As decider per ina da las duas pussaivladads che Vus chattais sin la pagina Dumonda per in nov passaport u ina nova carta d’identitad per empustar in nov passaport u ina nova carta d’identitad.
A l’exteriur
Suenter l’annunzia a la polizia pudais Vus empustar in nov passaport u ina nova carta d’identitad directamain tar il post, al qual Vus essas As drizzada u drizzà (consulat svizzer u ambassada svizra); Vus pudais er empustar ils documents online.
Resguardai per plaschair che Vus stuais quintar cun maximalmain 30 dis da lavur, fin che Vus survegnis ils novs documents.
En cas d’urgenza – per exempel sch’i n’è uschiglio betg pussaivel da turnar en Svizra – pudais Vus dumandar in passaport provisoric.
En cas d’urgenza giustifitgads pudais Vus far ina dumonda per in pass provisoric al post chantunal da passaports, a l’ambassada svizra u al consulat svizzer dal pajais, nua che Vus As chattais.