Dapi il cumenzament da l'onn 2012 na dovran ils velos betg pli ina vignetta. Ils donns envers terzas persunas che vegnan chaschunads en in accident da velo pon vegnir surpigliads da l'assicuranza privata da responsabladad. Velos electrics cun in'assistenza dal pedal per ina sveltezza da passa 25 km/h dovran dentant in numer d'immatriculaziun d'in velo a motor cun ina vignetta che sto vegnir renovada mintga onn (indicaziuns davart il lieu da retratga qua sutvart en il text).
La gronda part da las assicuranzas ha integrà la responsabladad en cas d'accidents da velo automaticamain en l'assicuranza privata da responsabladad. As infurmai per segirezza tar Vossa assicuranza. Tgi che n'ha betg in'assicuranza da responsabladad, n'è betg pli assicurà cunter donns ch'ella u el chaschuna en cas d'in accident cun velo envers terzas persunas.
La victima d'accident vegn indemnisada dal Fond naziunal da garanzia. Ma quel po pretender enavos ina part da l'import pajà u l'entir import pajà da la persuna che ha chaschunà l'accident. I vala pia la paina da far in'assicuranza da responsabladad correspundenta.
En connex cun velos electrics sto vegnir distinguì tranter velos electrics plauns (assistenza dal pedal fin 25 km/h) e velos electrics svelts (assistenza dal pedal fin 45 km/h).
La vegliadetgna minimala per tut ils velos electrics è 14 onns.
Velos electrics plauns dastgan vegnir guidads a partir da 16 onns senza permiss da manischar. Giuvenils che possedan in permiss da manischar da la categoria M (velos a motor) dastgan guidar a partir da 14 onns velos electrics plauns.
Per velos electrics svelts dovri en mintga cas in permiss da manischar (almain da la categoria M).
Cun velos electrics ston ins ir sin vias e sin vials da velo.
Cun velos electrics plauns dastgan ins ir sin vias ch'èn signalisadas cun in «scumond da traffic per velos a motor». Per velos electrics svelts vala quai mo, sch'ins metta giu il motor.
Velos electrics svelts dovran vinavant in numer d'immatriculaziun ed ina vignetta. (Sche Vus na survegnis betg il numer d'immatriculaziun e la vignetta directamain da la fatschenta da velos, pudais Vus As drizzar a l'uffizi per il traffic sin via da Voss chantun da domicil).
Vus stuessas purtar ina chapellina. Per velos electrics svelts èsi obligatoric da purtar ina chapellina.
Broschuras dal Post da cussegliaziun per la prevenziun d'accidents (PPA) davart l'equipament da velos, da velos da muntogna e da velos electrics chattais Vus qua.